भद्रकाली युवा क्लबको वृहत रक्तदान कार्यक्रम सम्पन्न

 रत्ननगर असार ५- चितवनको रत्ननगरमा रहेको भद्रकाली युवा क्लबले आयोजना गरेको बृहत रक्तदान कार्यक्रम आईतबार सम्पन्न भएको छ । चितवनका अस्पतालहरुमा देखिएको चरम रक्तअभावलाई मध्यनजर गर्दै क्लबले रक्तदान कार्यक्रम आयोजना गरेको हो । रत्ननगर १६ को भद्रकाली मन्दिर परिसरमा आयोजित कार्यक्रममा ५० जनाले रक्तदान गरेका छन् ।

कार्यक्रममा प्रमुख अतिथि समेत रहेका वडाध्यक्ष हेमराज थापाले युवा क्लबले रक्तदान जस्तो पुण्य कार्य गरेकोमा प्रसन्नता व्यक्त गरे। रगत दानभन्दा ठुलो अरू दान हुन नसक्ने भन्दै उनले यस्ता रचनात्मक कार्यहरू सबै ठाउँमा गरिनु आवश्यक रहेको औँल्याए ।

क्लबका अध्यक्ष निराजन घिमिरेले क्लबले रक्तदान लगायतका सामाजिक कार्यहरु गर्दै आइरेहेको र अस्पतालहरुमा रगत अभाव भइरहेको बेला आज रक्तदान कार्यक्रम आयोजना गरिएको बताए।

काठमाडौँमा मनायो चितवन खबर पत्रिकाले ११ औँ वार्षिकोत्सव

काठमाडौँ । चितवनको सञ्चार क्षेत्रमा अग्रणी स्थान ओगट्न सफल मोफसल कै चर्चित चितवन खबर राष्ट्रिय अर्ध साप्ताहिक पत्रिकाले आफ्नो गौरवमय ११ वार्षिकोत्सव काठमाडौँमा एक भब्य कार्यक्रम गरेर मनाएको छ । छापा पत्रकारिताको दुनियाँमा एक दशकदेखि अनवरत रूपमा प्रकाशनमा आएको चितवनबाट प्रकाशित पहिलो र एक मात्र रंगिन साप्ताहिक पत्रिका हो ।

शुक्रबार काठमाडौंमा एक कार्यक्रमका बीच विभिन्न क्षेत्रका प्रतिष्ठित व्यक्तिहरूको आतिथ्यतामा शुभकामना आदान प्रदान गरिएको थियो ।वार्षिकोत्सव कार्यक्रममा बोल्दै नेपाल चलचित्र कलाकार संघका महासचिव चेतबहादुर सिंह 'राजा' ले मोफसलमा रहेर विभिन्न चुनौतीका बिच पत्रकारितालाई नियमित गरेको भन्दै चितवन खबर पत्रिकाको उच्च प्रशंसा गरे । मिडियाले कला र कलाकारलाई सधैं माया गर्दै आएको भन्दै मिडिया र कलाकारिता बीच सधैं नङ र मासुको जस्तै सम्बन्ध हुनुपर्ने बताए । उनले विगत एक दशकदेखि देशको समग्र आर्थिक, सामाजिक, राजनैतिक रूपान्तरण खेलेको भूमिका अतुलनीय र अविस्मरणीय रहेको बताए । आगामी दिनमा पत्रिकाले सामाजिक उत्तरदायित्वका साथै आवाज विहीनको आवाजको रूपमा सदैव स्थापित हुने विश्वास व्यक्त गरे ।

कार्यक्रममा नेपाली चलचित्र उद्योगकी लोकप्रिय अभिनेत्री साम्राज्ञी राज्य लक्ष्मी शाहले पत्रकारिताको माध्यमबाट चितवन खबरले समाजलाई सुसूचित गरेको भन्दै प्रशंसा गरिन् । उनले आगामी दिनमा पत्रिकाले विकृति विसङ्गतिलाई चिर्दै समाजको ऐनाको रूपमा भूमिका निर्वाह गरेर अघि बढ्नुपर्ने भन्दै पत्रिकाको उत्तरोत्तर प्रगतिको कामना गरिन् ।

कार्यक्रमको सभापति एवम् पत्रिकाका महाप्रबन्धक हरि कार्की ‘लक्की’ ले आगामी दिनमा सबैको सल्लाह सुझाव अनुसार नै पत्रिकालाई अझ परिष्कृत र परिमार्जन गर्दै लैजाने र पत्रिकालाई यहाँसम्म ल्याई पुर्‍याउने समस्त पाठक, शुभेच्छुक विज्ञापनदाता प्रति कार्कीले आभार प्रकट गरे । महाप्रबन्धक कार्कीले पत्रिकाले जस्तोसुकै विषम परिस्थितिमा पनि पत्रिकाले आफ्नो व्यावसायिक धर्म निर्वाह गर्दै आएको बताए ।

त्यस्तै नेपाली सांगीतिक क्षेत्रका चर्चित बरिष्ठ सदावहार गायक आनन्द कार्कीले पत्रिकालाई शुभकामना दिंदै पत्रकारिताको जगतबाट चितवन खबरले समाजमा पुर्याएको योगदान प्रशंसा गर्नुभयो ।

कार्यक्रममा लक्की मिडिया हाउस चितवनका निर्देशक समाजसेवी गोविन्द राज पाण्डे, कलाकार कमल खड्का, चलचित्र पत्रकार मनिष कार्की लगायत नागरिक अगुवा , शुभेच्छुक, विज्ञापनदाता लगायतको उपस्थिति रहेको थियो । चितवन खबर पत्रिका सँगै अनलाइन संस्करण इ चितवन खबर डट कम मार्फत पनि सूचना समाचार सम्प्रेषण गर्दै आएको छ ।

बैशाख १६ मा सौगात र दियाको 'मन्त्र'

 

भर्सटायल अभिनेता सौगात मल्ल र दिया पुन स्टारर चलचित्र ‘मन्त्र’ बैशाख १६ मा आउने भएको छ । ११२औँ अन्तर्राष्ट्रिय महिला दिवस दिन काठमाडौँमा एक कार्यक्रमको आयोजना गर्दै निर्माण युनिटले चलचित्रको रिलिज मिति घोषणा गरेका हुन् । यो चलचित्र यस अघि माघ २८ मा प्रदर्शन गरिने भनिएको थियो तर कोरोना कहरले गर्दा प्रदर्शन हुन सकेको थिएन । 

हिमाली भेगको सुन्दर दृश्यहरु कैद गरिएको चलचित्र एउटा अर्गानिक नेपाली चलचित्र बनेको निर्माण पक्षले बताएको छ। चलचित्रमा गोरखाको मनास्लु क्षेत्र आसपासको कथाबस्तुलाई आधार बनाईएको छ । मनास्लु क्षेत्रमा पहिलो पटक छायाँकन गरिएको चलचित्रका दृश्यहरुले दर्शकको मन जित्नेमा कार्यकारी निर्माता देबेन्द्र मानन्धर बिश्वस्त रहेका छ्न् । 

 खिल बहादुर गुरुङ निर्देशित चलचित्र ‘मन्त्र’ मा सौगात र दियाले पहिलो पटक स्क्रिन शेयर गरेका छन् । चलचित्रमा बुद्दि तामाङ, नमिता घिसिङ्ग,बिर बहादुर लामा,पासाङ्ग टि शेर्पाको पनि मुख्य भूमिका रहेको छ । देबेन्द्र मानन्धर कार्यकारी निर्माता रहेको ‘मन्त्र’मा रविराज कार्की, सुरेश कार्की र सुभ श्रेष्ठको लगानी रहेको छ । 

साम्तेन भुटिया,सुनिल नेउरे,परिच्छेद सेनले लेखेको चलचित्रमा सन्तोष सुनारको संगीत, संजय लामाको छायांकन, मित्र डि गुरुङको सम्पादन,सुजिल कर्माचार्यको पार्श्व संगीत रहेको छ ।

 

रत्ननगर महोत्सव : विहीबार २० हजारले गरे अबलोकन

रत्ननगर । 

टिकौली चौरमा जारी रत्ननगर महोत्सव अन्तर्गत विहीवार २० हजारले अबलोकन गरेको आयोजकले दावी गरेको छ । 

 रत्ननगर उद्योग बाणिज्य संघले आयोजना गरेको सो महोत्सवमा अबलोकनकर्ताको संख्या बढ्दै गएको हो । विहीबार सार्वजनिक विदा परेकाले आयोजकले अपेक्षा गरेभन्दा पनि बढीले महोत्सव अबलोकन गरेको संघका अध्यक्ष तथा महोत्सव मुल समारोह समितिका संयोजक अनिलकृष्ण श्रेष्ठले बताए । समग्र चितवनको आर्थिक विकास गर्ने उद्देश्यले आयोजना गरिएको सो महोत्सवमा सामाग्री किनमेल गर्नको लागि व्यवसायिक स्टलहरुमा भीड लाग्ने गरेको छ । घरायसी प्रयोजनको लागि चाहिने सामाग्री खरिदमा मान्छेहरुको भीड लागेको हो । 

 वालउद्यान,जीप साइकलिङ,जीपलाइन सफारीमा पनि मान्छेको आर्कषण रहेको छ । फागुन २३ गते सम्म सञ्चालन हुने सो महोत्सवमा ४२५ स्ट रहेका छन् । महोत्सव ३ लाख भन्दा बढी दर्शकले अवलोकन गर्ने र १५ करोड रुपैयाँ भन्दा बढीको कारोबार हुने अपेक्षा गरिएको संघका बरिष्ट उपाध्यक्ष शंकर गिरीले बताए । 

रत्ननगर महोत्सवमा खुल्ला भलिबल प्रतियोगिता

रत्ननगर १९ फागुन । 

रत्ननगरको टिकौलीमा जारी रत्ननगर महोत्सव अन्तर्गत खुल्ला भलिबल प्रतियोगिता हुँदैछ । 

 

रत्ननगर उद्योग बाणिज्य संघको आयोजनामा फागुन २० गतेबाट महोत्सव परिसरमा प्रतियोगिता हुनेछ । प्रतियोगितामा १० वटा टिमको सहभागिता रहने छ । प्रतियोगिता अन्तर्गत हुने खेलमा राष्ट्रिय स्तरका चर्चित खेलाडीहरु समेत सहभागी हुने आयोजकले जनाएको छ । महोत्सव मार्फत खेलकुदको विकास गर्ने उद्देश्यले भलिवल प्रतियोगिता आयोजना गरिएको संघका अध्यक्ष अनिलकृष्ण श्रेष्ठले बताए । 

प्रतियोगितामा प्रथम हुने टिमले एक लाख १००,दोस्रो हुने टिमलाई ५५ हजार,तेस्रो हुने टिमलाई २० हजार र सान्त्वना हुने टिमलाई १० हजार पुरस्कार राशी रहेको खेलकुद व्यवस्थापन समितिका संयोजक अनुप विसुरालले बताए । प्रतियोगितामा उत्कृष्ट हुने खेलाडीलाई ५ हजार नगद पुरस्कार प्रदान गरिने छ ।

टिकौलीमा सुरु भयो रत्ननगर महोत्सव,प्रदेशमन्त्रीद्धारा उद्घाटन

रत्ननगर । कोभिडका कारण स्थगित भएको रत्ननगर महोत्सव आइतबार देखि सुर भएको छ । महोत्सवको ११औं संस्करण टिकौली चौरमा सुरु भएको हो । गत पौष २७ गते सुरु हुने भनिएको महोत्सव कोरोनाको तेस्रो लहरका कारण स्थगित भएको थियो । रत्ननगर उद्योग बाणिज्य संघद्वारा आयोजित महोत्सवको भव्य उद्घाटन गरिएको छ । विभिन्न संघसंस्थाको उपस्थितिमा हात्ती सहितको शोभायात्राबाट सुरु गरिएको महोत्सवको उद्घाटन बागमती प्रदेशका उद्योग,बाणिज्य तथा आपूर्तिमन्त्री मिलनबावु श्रेष्ठले गरेका हुन् ।

फागुन २३ गते सम्म सञ्चालन हुने सो महोत्सवमा महोत्सवमा कृषि र पर्यटन प्रवर्धनलाई विशेष जोड दिइएको छ । महोत्सवमा उद्योग, व्यापार, कृषि, पर्यटन, स्थानिय कला र संस्कृति सहित राष्ट्रिय, अन्तर्राष्ट्रिय तथा बहुराष्ट्रिय गरि करिब ४२५ स्टलहरु रहेको छ । यसपटकको महोत्सवमा करिब १५ करोड भन्दा बढिको कारोबार हुने अनुमान गरिएको छ ।

 

व्यवसायीहरुले महोत्सवलाई एउटा अवसरको रुपमा लिने पनि बताएका छन् । कोरोनाले गर्दा सुस्ताएको व्यापारलाई महोत्सवले केही हदसम्म भएपनि उकास्नेमा उनीहरु विश्वस्त रहेका छन् ।

स्थगित भएको महोत्सवलाई एउटा अवसरको रुपमा हेरिरहदाँ स्टेजमा भने अतिथि नेताहरुले एमसिसिको बारेमा मत जाहेर गरिरहेका थिए । देशकै एउटा मुद्दाको रुपमा रहेको एमसिसिको पक्ष र विपक्षमा नेताहरु बिच भनाभन नै भयो । काँग्रेसका नेता तथा पूर्व शिक्षामन्त्री शेषनाथ अधिकारीले एमसिसी नेपालको हितको लागि भएको बताए । अनुदानको रकमले गरिबी निवारणका साथै देशको विकासमा सघाउँ पुग्ने उनले प्रस्ट पारे ।

एमालेका नेता तथा पूर्व प्रदेश मन्त्री दावादोर्जे लामाले भने एमसिसी स्विकार्न नसकिने बताए । एमसिसि देश हितको लागि नभएको पनि उनले बताए । माओवादी केन्द्रकी नेतृ तथा प्रदेश साँसद कन्चन खनालले एमसिसीका विरुद्धमा खबरदारी गर्नुपर्ने बताइन् । एमसिसीको विरुद्धमा जनस्तरबाट नेताहरुलाई खबरदारी गर्न आवश्यक छ रहको पनि उनले बताइन् ।

कार्यक्रममा महोत्सव मुल समारोह समितिका संयोजक अनिलकुष्ण श्रेष्ठले उद्योगमा लगानीको बाताबरण सृजना गर्न राज्यको ध्यान जान आवश्यक रहेको बताए ।

कार्यक्रममा नेपाल उद्योग बाणिज्य महासंघका उपाध्यक्ष दिनेश श्रेष्ठ, रत्ननगर नगरपालिकाका प्रमुख नारायण वन, संघका बरिष्ठ उपाध्यक्ष शंकर गिरी, प्रदेश मन्त्री कृष्णप्रसाद भूर्तेल,उद्योग बाणिज्य महासंघ प्रदेश अध्यक्ष दिलसुन्दर श्रेष्ठ,नेकपा एमाले चितवनका अध्यक्ष रामप्रसाद न्यौपाने,चितवन उद्योग बाणिज्य संघका अध्यक्ष राजु श्रेष्ठ लगायतले मन्तव्य राखेका थिए ।

 

भोलीदेखि चिकेन एण्ड एग फुड फेष्टिबल

रत्ननगर । 

 चितवनको रत्ननगरमा भोली सोमबार देखि चौथो चिकेन एण्ड एग फुड फेष्टिबल सुरु हुदैछ ।

 

 रत्ननगर महोत्सव अन्तर्गत टाँडीचोक र सौराहाचोकको बीचमा पर्ने बसपार्कसंगै जोडिएको ठाँउमा फेष्टिबल आयोजना गरिएको हो । आयोजक रत्ननर उद्योग बाणिज्य संघले आइतवार पत्रकार सम्मेलनको आयोजना गरी फेष्टिबलको सम्पूर्ण तयारी पुरा भएको जनाएको छ । पोल्टीको राजधानी मानिने चितवनमा कुखुराको मासु र अण्डाको खपत बढाउन र महत्व बुझाउन फुड फेष्टिबल आयोजना गरिएको संघका पूर्व अध्यक्ष ज्ञानबहादुर विसुरालले बताए । 

२५ वटा स्टल रहने फुड फेष्टिबलमा २० वटा अण्डा र १० वटा कुखुराको मासुको परिकार उपलब्ध गराउने फुड फेष्टिबल राजेन्द्र कुमार श्रेष्ठले बताए । कुखुराको मासु र अण्डाको लगवा माछा र बुंगुरको परिकार सहित नेवारी,थारु समुदायका खानाका परिकार समेत उपलब्ध हुने उनले बताए । संघका अध्यक्ष अनिककृष्ण श्रेष्ठले पोल्ट्री र माछाको खपत बढाउने र उपभोगबाट हुने फाइदाका विषयमा जानकारी दिने उद्देश्यले फुड फेष्टिबल आयोजना गरिएको बताए । फुड फेष्टिबल वागमती प्रदेशका पशुपंछी विकासमन्त्री बसुन्धरा हुमागाईले उद्घाटन गर्नेछन ।

 पत्रकार सम्मेलनमा संघका बरिष्ट उपाध्यक्ष शंकर गिरी,पूर्वी चितवन कुखुरा व्यवसायी संघका अध्यक्ष हरिकृष्ण खनाल लगायतको सहभागिता रहेको थियो । फेष्टिबलमा विभिन्न सांस्कृतिक कार्यक्रम समेत हुने छ ।

चितवनमा चर्चित कलाकारहरुको साथमा बहुप्रतिक्षित चलचित्र 'म यस्तो गीत गाउँछु २' को प्रिमियर शो हुँदै

चितवन । चितवनको नारायणगमा बहुप्रतिक्षित चलचित्र 'म यस्तो गीत गाउँछु २' को प्रिमियर शो हुँदैछ । मोफसलकै चर्चित लक्की मिडिया हाउस चितवनले विभिन्न नेपाली कलाकाहरुको साथमा चलचित्र देखाउने तयारी गरेको हो ।

कोभिड १९ बाट सबैभन्दा बढी प्रभावित भएको चलचित्र क्षेत्रलाई चलायमान बनाउन र आम दर्शकहरुलाई फिल्म हलमा चलचित्र हेर्नका लागि आह्वान गर्दै प्रिमियर शो कार्यक्रम गर्न लागिएको छ । नेपाली सिनेमा बजारको प्रचार-प्रसार र सिनेमा क्षेत्रको प्रवद्धनको लागि निरन्तर लागिरहेको लक्की मिडिया हाउसले चर्चित कलाकारहरुको साथमा बहुप्रतिक्षित चलचित्र 'म यस्तो गीत गाउँछु २' को प्रिमियर शोको तयारी गरिएको लक्की मिडिया हाउस चितवनका महाप्रबन्धक तथा कार्यक्रम संयोजक हरि कार्की 'लक्की'ले जानकारी दिनुभयो।

प्रिमियर शो चितवनको सुबिधा सम्पन्न सिजी ल्याण्डमार्कमा रहेको चितवन सिनेप्लेक्समा फागुन १२ गते, बिहीबार साँझ ६ बजे गरिदैछ । कार्यक्रममा नेपाली सिने क्षेत्रमा अतुलनीय योगदान दिनुभएका कलाकार संगै चितवनमा बिभिन्न क्षेत्रमा आबद्र रहेका व्यक्तिहरुलाई सम्मान गरिने मिडिया हाउसका महाप्रबन्धक तथा कार्यक्रम संयोजक हरि कार्की 'लक्की'ले बताउनुभयो।

कार्यक्रममा चलचित्र 'म यस्तो गीत गाउँछु २' का कलाकारहरु संगै अन्य चलचित्रकर्मीहरुको पनि बाक्लो उपस्थिती रहने छ । लक्की मिडिया हाउस चितवनले विभिन्न नेपाली चलचित्रहरुको कलाकाहरुको साथमा रेड कार्पेट प्रिमियर शो, प्रिमियर शो, विशेष शो तथा च्यारीटी शो गर्दै आएको छ । यस अघि पनि विभिन्न कलाकार तथा विभिन्न क्षेत्रका व्यक्तित्वहरुलाई चलचित्रको विशेष शोको आयोजना गर्दै सम्मान गरेको थियो ।

सिनेमामा पल शाह, पूजा शर्मा, हरिहर शर्मा, दिनेश डिसी, राजा राजेन्द्र पोखरेल, सोनिका रोकाय लगायतका कलाकारको अभिनय रहेको छ । शिवम अधिकारी र दिनेश न्यौपानेले मिलेर सिनेमाको कथा लेखेका हुन् । निर्देशक सुदर्शन थापा र अभिनेत्री शर्माको लगानी रहेको सिनेमाका सह निर्माता जन्मजय र साम्पाङ्ग राई हुन् ।

 

जागृति टोलको साधारण सभा, सन्तोष अधिकारी सहितको युवा टिम चयन

१५ माघ, शनिवार
रत्ननगर

 

रत्ननगर १० को जागृति टोल बिकास संस्थाले सत्रौं वार्षिकोत्सब तथा साधारण सभा सम्पन्न गरेको छ । 

 साधारण सभा उद्घाटन सत्रको अध्यक्षता टोल बिकास संस्थाकी अध्यक्ष शोभा धितालले गर्नुभएको हो ।
कार्यक्रमको प्रमुख अतिथि वडा नं १० का वडा अध्यक्ष केशव आचार्यले जागृति टोलले वडाको बिकासमा रचनात्मक भूमिका खेलेकोमा प्रशंसा ब्यक्त गरे ।
सत्य साई केन्द्र बाग्मति प्रदेश सदस्य तथा टोल सदस्य संजय बरालले स्वागत मन्तव्य ब्यक्त गरेका थिए ।
संस्थाको गतिविधि तथा आगामी कार्ययोजना टोल बिकास संस्थाका तर्फबाट निवर्तमान अध्यक्ष सुजन बरालले पेश गरेका थिए ।
कार्यक्रममा सामाजिक अभियान्ता ज्ञानेन्द्रराज पाण्डे, टोल सल्लाहकार देवी दवाडी, उन्नति टोलका अध्यक्ष यमप्रसाद भट्ट लगायतले शुभकामना मन्तव्य व्यक्त गरेका थिए ।
बार्षिक आय ब्यय प्रतिबेदन संस्थाका कोषाध्यक्ष माया पौडेलले प्रस्तुत गरेकी थिईन ।
कार्यक्रम संचालन टोल बिकासका सल्लाहकार ईन्द्र बिलास न्यौपानेले गरेका थिए ।

कार्यक्रममा टोल बिकासको कार्यमा अहोरात्र सहयोग पुर्याउने संस्थाका निवर्तमान अध्यक्ष सुजन बराल, निवर्तमान सचिब राजेन्द्र अधिकारी, निवर्तमान कोषाध्यक्ष शरण अधिकारी तथा टोलका ज्येष्ठ नागरिक मीनकुमारी अर्याल, कृष्णकुमारी अधिकारी एवं शुकदेव अधिकारी लाई दोसल्ला तथा सम्मान पत्रले सम्मान गरिएको हो ।

नयाँँ कार्यसमिति चयन

टोलका ज्येष्ठ नागरिक दिनानाथ अधिकारीको अध्यक्षतामा अधिवेशन सभाबाट पाँच सदस्यीय नयाँ कार्य समिती सर्वसम्मत चयन गरिएको हो । अध्यक्ष सन्तोष अधिकारी, उपाध्यक्ष रिता पौडेल, सचिब रामु पौडेल, कोषाध्यक्ष नवराज अधिकारी तथा सह-सचिब सुमित्रा अधिकारी नयाँ कार्य समितिमा चयन भएका हुन् । टोलले ३२ बर्षिय युवा सन्तोष अधिकारी सहितको जुझारु युवा टिम पाएको छ ।
 

कालीगण्डकी नदीमा ३१ हजार माछाका भुरा छाडियो

 प्रकाश सिग्देल

माघ १३

 

कालीगण्डकी नदीमा ३१ हजार माछाका भुरा छाडिएको छ । प्राकृतिक जलाशय मत्स्य प्रर्वद्धन एवं संरक्षण केन्द्र हेटौँडा मकवानपुरले रहु र नैनी जातका माछाका भुरा कालीनदिमा छाडेको । गैडाकोट नगरपालिका प्रमुख मेयर छत्रराज पौडेलको प्रमुख आतिथ्यतामा यहाँ माछाका भुरा छाडिएको हो ।

गैँडाकोट नगरपालिकावडा नम्वर ३ को ढोडेनी देखी १० किलोमिटर माथि महेश्वर खोला भ्रोक्रे फाट भन्ने स्थानमा पुगेर काली नदिमा माछा छाडेको हो । नदीमा पुगेर ३१ हजार माछाका भुरा छाडिएको कार्यालयका प्रमुख सरोज कुमार यादवले बताए ।

मेयर पौडेल आफै त्यहा सम्म पुगेर कार्यक्रममा सहभागिता जनाएर उनकै हातबाट माछाको भुरा नदीमा छोड्न पाउँदा आफुहरु धेरै खुसि भएको यादवले बताए ।कालि नदीमा माछाका भुरा छाड्दै मेयर पौडलले नदीमा माछाको प्रर्वद्धन गरी प्रकृतिको संरक्षणमा प्राकृतिक जलाशय मत्स्य प्रर्वद्धन एवं संरक्षण केन्द्रले महत्वपुर्ण काम गरेको बताए । जलिय जैबिक बिविधता संरक्षण तथा प्राकृतिक जलाशयमा आश्रीत समुदायको आय स्तर अभिवृद्धिका लागि यो कार्यक्रमले महत्वपुर्ण भुमिका खेल्ने मेयर पौडेलको भनाई छ । कालि नदीको संरक्षणका लागि यो महत्वपुर्ण काम भएको पौडेलको दावी छ ।

कार्यालयले यस अघि मकवानपुरको सामारी नदीमा पनी ३४ हजार र नारायणी नदीमा ४० हजार भुरा छोडीसकेको छ  । त्यस्तै कोशी नदीमा पनि माछाको भुरा छोड्ने योजना रहेको यादवले बताए ।खोला नालामा फोहोर ढल मिसाउने, बिषादी हाल्ने, करेन्ट लगाउने, पासो थाप्ने, नदिजन्य पदार्थको चरम दोहन गर्ने लगाएतका कारणबाट जलचर मासिने क्रम बढेकाले यसको संरक्षण गरी नदीमा आश्रित समुदायको जिवनस्थर विकासका लागि आफुहरुले यो कार्यक्रम गरेको यादवको भनाई छ ।

त्यस्तै कार्यालयले गैँडाकोट ३ स्थित ढोडेनी बजारमा रहेको बिद्यालय परिसरमा माछा संरक्षणका लागि सचेतना मुलक होडिगं बोर्ड समेत लगाएको छ । आफुहरुको मेची देखी महाकाली सम्म कार्यक्षेत्र रहेको र नदी नालाको अध्यायन गरी कुन माछा संकटमा छ त्यसको आधारमा माछालाई प्रर्वद्दन गर्न माछा भुरा छाँडिदै आएको यादवको भनाई छ । नेपालमा ४ लाख १ हजार हेक्टर प्राकृतिक जलाशयको क्षेत्रफल रहेको र देशमा उत्पादन हुने कुल ९७ हजार मेटिक टन माछा मध्य २१ प्रतिशत माछा प्राकृतिक जलाशयबाट उत्पादन हुने यादवले बताए । प्राकृतिक जलाशयमा ४ लाख जनसंख्या निर्भर रहेको उनकोे भनाई छ ।

जलाहारी बोटे लगायतका समुदायको आयस्थर विकास गर्न र नदीनाला बाट माछा मारेर जिवन निर्वाह गर्ने समुदायको हितका लागि यो कार्यक्रम संचालन गरिएको यादव बताउँछन । यसले पानीमा आश्रित गोही लगाएतका जनावरलाई समेत फाईदा पुग्ने उनको भनाई छ ।

रत्ननगरका विपन्न किसानलाई अनुदानमा गाई

रत्ननगर १३ माघ । चितवनको रत्ननगर नगरपालिकाले आर्थिक अबस्था कमजोर रहेका पशुपालक किसानहरुलाई अनुदानमा गाई वितरण गरेको छ । 

पशुपालन मार्फत गरिबी न्यूनीकरण गर्ने उद्देश्यले ५० प्रतिशत अनुदानमा गाई वितरण गरिएको हो । विहीबार नगरपालिकामा एक औपचारिक कार्यक्रमको आयोजना गरी सो नगरपालिकाले विपन्न किसानहरुको पहिचान गरी दुहुना गाई वितरण गरेको हो ।

किसानलाई गाई वितरणको लागि सो नगरपालिकाको नवौं नगर सभाले एक करोड रुपैया विनियोजन गरेको थियो । नगरपालिकाको एक करोड र किसानको एक करोड गरी दुई करोडको लगानीमा २०० वटा दुधालु गाई वितरण गर्ने योजना रहेको प्रमुख प्रशासकीय अधिकृत शिशिर पौडेलले जानकारी दिए । विहीबार १६ जना किसानलाई ५० प्रतिशत अनुदानमा गाई वितरण गरिएको छ । 

सो नगरपालिकाले गाईसंगै गोठ सुधारको लागि १० हजार रुपैया समेत प्रदान गरेको छ । नगरपालिकाले प्रदान गरेको १० हजारमा किसानले १० हजार थप गरी २० हजारमा गोठ मर्मतको काम गर्नुपर्छ । गाईको सवालमा किसानले कम्तिमा ८० हजार मुल्य बराबरको गाई खरिद गर्नुपर्छ । विहान बेलुका गरी कन्तिमा १० लिटर दुध दिने र सो गाई पूर्ण रुपमा स्वस्थ्य हुनुपर्ने पशु विकास अधिकृत शालिग्राम पौडेलले बताए । 

नगरपालिकाले किसानको आर्थिक अबस्था मुल्याङकन गरी पशुपालनबाटै जीविका चलाउछु भन्ने विश्वास भएको किसानलाई मात्र गाई वितरण गर्ने उनले जानकारी दिए । मेयर नारायण वन,उपमेयर विमला दुवाडीले नगरपालिकाको प्राङ्गढमा किसानलाई गाई हस्तान्तरण गरेका छन् । अनुदानमा गाई पाएपछि किसानहरु उत्साहित भएका छन् ।

रत्ननगर १३ अमेलियाकी किसान पदमकुमारी न्यौपानेले यस अघि नगरपालिकाले दिएको अनुदान रकमबाट बाख्रापालन गरी जीविकोपार्जन गरेको र अहिले गाई समेत पाउदा खुसी लागेको बताइन । उपमेयर दुवाडीले नगरको गौरबको योजना अन्तर्गत किसानलाई गाई वितरण सुरु गरिएको बताइन । 

मेयर वनले सुत्केरी पशुलाई भत्ता पछि किसानलाई उद्यमी बनाउन गाई वितरण गरिएको बताए । विदेशबाट फर्किएर स्वदेशमै केही गर्न इच्छुक युवा र आर्थिक अभावका कारण पशुपालन गर्न नसकेका गरिब किसानहरुको पहिचान गरी गाई वितरण गरिएको बताए । कार्यक्रममा आर्थिक विकास समितिका संयोजक गुप्तनाथ भट्टराई,नेकपा एमालेका नगर सचिव शिवराज सुवेदी,नेपाली कांग्रेसकी नगर सचिव अनिता अर्याल लगायतले मन्तव्य राखेका थिए । 

 

अलपत्र निर्माणाधीन गौतमबुद्ध अन्तर्राष्ट्रिय क्रिकेट रंगशालाको काम अगाडि बढाउन भरतपुर महानगरपालिकाले थाल्यो गृहकार्य

चितवन ।  चितवनमा निर्माणाधीन गौतमबुद्ध अन्तर्राष्ट्रिय क्रिकेट रंगशालाको काम अगाडि बढाउन भरतपुर महानगरपालिकाले गृहकार्य थालेको छ । ‘धुर्मुस सुन्तली’ फाउन्डेसनले ३ वर्षअघि शुरू गरेको रंगशाला निर्माणको काम अहिले अलपत्र छ ।आर्थिक संकटका कारण धुर्मुस–सुन्तलीले रंगशाला निर्माणको कामबाट हात झिकेपछि भरतपुर महानगरले सक्रियता लिएको छ ।

रंगशालाको काम अगाडि बढाउने विषयमा भरतपुर महानगरले सर्वपक्षीय अन्तर्क्रिया राखेको थियो । सरकारले आर्थिक सहयोग गरेमा महानगरपालिका आफैंले रंगशाला निर्माणको काम गर्ने तयारी गरेको छ ।

अन्तरक्रिया कार्यक्रममा बोल्दै युवा तथा खेलकुद मन्त्री महेश्वर जंग गहतराजले गौतमबुद्ध अन्तर्राष्ट्रिय क्रिकेट रंगशाला निर्माण अलपत्र पर्न नदिने प्रतिबद्दता जनाए ।उनले खेलकुद क्षेत्रको गौरवको आयोजना भएकाले यो परियोजना अलपत्र पर्न नदिने बताए ।

नेपालमा अन्तर्राष्ट्रिय स्तरका खेल खेलाउन मिल्ने रंगशाला नभएको भन्दै उनले सबै हिसाबले उपयुक्त ठाउँमा रहेकाले भरतपुरमा निर्माण रोकिएको रंगशाला सम्पन्न गर्नुपर्नेमा जोड दिए । कुन तरिकाले व्यवस्थापन गर्न सकिन्छ भन्ने बिषयमा मन्त्रालयको सिंगो टोली यहाँ आएको भन्दै मन्त्री गहतराजले टोलीलले अध्ययन थाल्ने बताए । रंगशाला सम्पन्न गर्न स्थानियको चासो हुनु पर्ने भन्दै उनले भने “तपाईहरु एक ढिक्का भएर नलागे परियोजना अलपत्र पर्न सक्छ ।”

केन्द्र, प्रदेश र महानगरको संयुक्त प्रयासबाट रंगशाला सम्पन्न हुने उनको भनाई थियो । खेलकुदका पूर्बाधारहरु बजेटको अभावमा अलपत्र परेका भन्दै दातृ निकायहरुसंग आर्थिक सहयोगका लागि कुराकानी समेत भईरहेको उनले बताए। रंगशाला निर्माणको जिम्मा लिएको धुर्मुश–सुन्तली फाउण्डेशनले अहिले सम्मको खर्च बिबरण यथाशिघ्र सार्बजनिक गरेर बुझाएमा काम अघि वढाउन सहज हुने मन्त्री गहतराजको भनाई थियो । राष्ट्रिय सहमती जुटेर अघि वढेको देशकै यो नमुना परियोजना भएकाले यसलाई सम्पन्न गर्न मन्त्रालयको ध्यान गएको छ,उनले भने ।

युवा तथा खेलकुद मन्त्रालयका सचिब डा.दामोदर रेग्मीले परियोजना सम्पन्न गर्न मन्त्रालय सकारात्मक रहेको बताए । कार्यक्रममा भरतपुर महानगरपालिका प्रमुख रेनु दाहालले रंगशालाको हाल सम्मको संक्षिप्त बिबरण पेश गर्दै सो को दिर्घकालिन व्यवस्थापन गर्नका लागि महानगरपालिकाको स्रोत, साधन र क्षमताले नभ्याउने भएकाले संघिय सरकारको निर्णय आबश्यक भएको बताईन । यो महानगर भित्रको गौरबको आयोजना भएको भन्दै प्रमुख दाहालले यसमा ३० हजार भन्दा बढि नागरिकको आर्थिक रुपमा योगदान रहेको बताईन ।

कार्यक्रममा प्रदेश सभा सदस्य, राजनैतिक दलका जिल्ला स्थित प्रमुख एबं प्रतिनिधिहरु, उद्योगी व्यवसायी, खेल प्रेमि लगाएतले सुझाब दिदै यो आयोजना संघिय सरकारले सम्पन्न गरेर व्यवस्थापन गर्नु पर्नेमा जोड दिएका थिए ।आर्थिक बिषय सार्बजनिक गर्नुपर्नेमा जोड दिए पछि फाउण्डेसनका अध्यक्ष सिताराम कट्टेलले केही दिन भित्रमानै आय–व्यय सार्बजनिक गर्ने बताए ।

यो आयोजना बिशम परिस्थितिका कारण सम्पन्न गर्न नसके पनि आर्थिक रुपमा पारदर्शि गरिएको बताए । भरतपुरमा निर्माणाधिन रंगशाला आर्थिक अभावका कारण बिगत चार महिना देखि काम रोकिएको छ । सो आयोजना सम्पन्न गर्न रु ३ अर्ब हाराहारी खर्च हुने अनुमान रहेको छ । फाउण्डेसनले आर्थिक अभाव भएको भन्दै आयोजनाको स्वामित्व लिइदिन भरतपुर महानगरपालिकालाई अनुरोध गरेको छ ।

अन्तरक्रिया कार्यक्रम अघि मन्त्री गहतराज सहितको मन्त्रालयको टोलिले काम रोकिएको रंगशालाको निरिक्षण गरेको थियो । सो अबसरमा महानगर प्रमुख दाहाल, उपप्रमुख पार्बती शाह ठकुरी लगाएतको उपस्थिति रहेको थियो ।

 

रोटरी क्लवद्धारा विपन्न विद्यार्थीलाई न्यानो कपडा वितरण

रत्ननगर १२ माघ । रोटरी क्लव अफ रत्ननगरले बुधवार विद्यार्थीहरुलाई न्यानो कपडा बितरण गरेको छ । रत्ननगर १२ मा रहेको पञ्चदीप आधारभुत विद्यालयमा अध्ययनरत २४९ बालबालिका लाई न्यानो कपडा बितरण गरिएको हो ।

 कार्यक्रमका प्रमुख अतिथि जोन ३० का एजी नारायण प्रधानले रोटरी भनेको स्वार्थ भन्दा माथि सेवा भन्ने अभिप्राय बोकेर समाजमा शिक्षा, स्वास्थ्य लगायत सामाजिक क्षेत्रमा काम गर्दै आइरहेको बताए । विद्यालयमा थप नयाँ सम्स्या भएमा क्लव अन्य बिभिन्न पोजेक्टबाट समेत सघाउने प्रतिवद्दता ब्यक्त गरे ।

 कार्यक्रमका बिशिष्ट अतिथि रत्ननगर वडा नं १२ का वडा अध्यक्ष वीरबहादुर पाख्रिनले रत्ननगर जस्तो सम्पन्न नगरपालिकामा बालबालिकाहरु न्यानो कपडाका लागि अरुको मुख ताक्नुपर्ने अवस्था हुनु दुर्भाग्य भएको बताए । बडाले केही परिवर्तनमुखी काम गर्न चाहेरपनी बजेटको अभावले गर्दा सोचे अनुरुपको काम गर्न नसकेको स्विकार गरे ।

 कार्यक्रममा समाजसेवी तथा व्यवसायी भेषराज दुवाडीले बिपन्न परिवारका बालबच्चा अध्ययन गर्ने यो विद्यालयमा विद्यालय प्रतिको आकर्षण बढाउन तथा सामाजिक उत्तरदायित्वको बहन गर्दै आफ्नो क्लवले यो कार्यक्रमको आयोजना गरेको बताए । देशलाई विकासको मार्गमा अघि बढाउन शिक्षा अपरिहार्य रहेको भन्दै शिक्षामा सबैको पहुँच पुर्याउन सामुदायिक विद्यालयलाई सबैले ध्यान दिन जरुरी रहेको बताए ।

 जनप्रतिनिधि र शिक्षकले कमसेकम आफ्ना बाबुनानी सामुदायिक विद्यालयमा पढ्न पठाउने गरेमा समुदायको सामुदायिक विद्यालयप्रतिको आकर्षण बढ्ने दुवाडीले बताए । 

कार्यक्रममा विद्यालयकी प्रधानाध्यापक शर्मिला भट्टले विद्यालयको शैक्षिक गुणस्तर उकास्न अनवरत लागिरहेको भन्दै दरवन्दीको अभाव लगायत अन्य यावत समस्या विद्यमान रहेकाले बेलाबेलामा यस्ता सामाजिक उत्तरदायित्व बोधहुने यस्ता कार्यक्रमले हामीलाई हौसला प्रदान गर्ने भन्दै आयोजकलाई धन्यवाद ब्यक्त गरिन ।

 रोटरी क्लव अफ रत्ननगरका अध्यक्ष तथा कार्यक्रमका सभापति निराजन खनालले आफ्नो क्लवले सदैव शिक्षालाई प्रार्थमिकतामा राखेर सामाजिक कार्य गर्दै आईरहेको बताए । यस विद्यालयमा न्यानो कपडा बितरण गर्न आँउदा यस बिद्यालयको सम्स्यासंग आँफुहरु नजिक हुन पाएको र अब सो निराकरण गर्न आफ्नो क्लव लागि पर्ने बताए ।

 कार्यक्रममा कार्यक्रमको सहआयोजक रोट्र्याक्ट क्लव अफ रत्ननगरका तर्फबाट राजिव शर्मा अतिथि, विद्यालय व्यवस्थापन समितिका अध्यक्ष जितबहादुर तमाङ, क्लवका पूर्व अध्यक्ष प्रेमकृष्ण खनाल, बुद्धराम जोशी, क्लवका निवर्तमान अध्यक्ष शिवराज उप्रेती, क्लव डाइरेक्टर उपेन्द्र आचार्य, शक्तिशाली आमा समुहकी अध्यक्ष तथा क्लव सदस्य बिरंजना सापकोटा घिमिरे, क्लव सदस्य प्रकाशमणि सापकोटा लगायतको उपस्थिति रहेको थियो ।

 

 

रत्ननगरमा एड्वानको अन्तरक्रिया, महिला हिंसा तथा मदिरा न्यूनीकरणमा जोड

माघ ११, रत्ननगर ।

 रत्ननगरमा महिला हिंसा अन्त्य तथा अल्कोहल न्यूनीकरणमा संचारकर्मीहरुले खेल्नुपर्ने भूमिका तथा जनप्रतिनिधिले वहन गर्नुपर्ने उत्तरदायित्व सम्बन्धमा अन्तरक्रिया गरिएको छ । नेपाल दलित महिला उत्थान संघ (एड्वान) ले आयोजना गरेको कार्यक्रममा विभिन्न टोलका अगुवा महिला, स्थानिय पत्रकारहरु, नेपाल बसोबासका प्रतिनिधि लगाएतको उपस्थिति रहेको थियो ।

  बिशेष गरि शिक्षाको कमि तथा गरिवीले घेरेको समाजमा अत्याधिक रुपमा महिला हिंसा तथा मदिरा सेवनको क्रम रहेको साथै मदिराको प्रयोग धर्म संस्कृति संग पनि जोडिएर आउने भएको हुँदा यसलाई पूर्ण रुपमा निस्तेज पार्न नसके पनि त्यसलाई बिस्तारै कम गर्दै लैजान सडक नाटक, मोटिभेसनका कार्यक्रम, पोस्टर निर्माण लगाएतका विभिन्न कार्यक्रम ल्याईने एड्वान की महासचिव बिन्दु परियार थापाले बताएकी छिन । कार्यक्रमका सहभागीहरुले एड्वानले ल्याएको यो कार्यक्रमको प्रशंसा गर्दै आफुहरु एड्वानको हरेक कार्यक्रममा साथ रहने बताएका थिए ।

  एड्वानले महिलाको आर्थिक उन्नति, सामाजिक जनचेतना, छात्रवृत्ति कार्यक्रम, बालिका शिक्षा कार्यक्रम, जातीय विभेद विरुद्ध कार्यक्रम लगाएतका कार्यक्रमहरु संचालन गरिरहेको छ । हाल भरतपुर महानगरपालिका र रत्ननगर नगरपालिकामा आफ्नो कार्यहरु अगाडी बढाईएको र निकट भविष्यमा नै खैरहनी नगरपालिकामा समेत आफ्नो कार्यक्षेत्र विस्तार गरिने महासचिव बिन्दु परियार थापाले जानकारी दिएकि छिन ।

रोयल पेन्ट्सको उपहार योजना सार्बजनिक, छबिलालले पाए १५० सिसिको पल्सर बाइक

रोयल पेन्टस प्रा.लि.ले आफ्ना ग्राहकहरुको लागि आयोजना गरेको रोयल पेन्टसको बहार, बम्परमा पल्सर उपहार योजना एक कार्यक्रमबीच सार्बजनिक गरेको छ।

 गत भाद्र १ गते देखि कार्तिक ३० गतेसम्म नेपाल भरका विभिन्न डिलरहरुबाट रोयल पेन्ट्स खरिद गर्ने ग्राहकहरुका लागि यो योजना संचालन गरिएको थियो। रोयल पेन्टस प्रा लि.को आधिकारिक फेसबुक पेजबाट लाइभ गरि गोला प्रथाको माध्यमबाट बिजेता घोषणा गरिएको सो कार्यक्रममा  रोयल पेन्टस प्रा लि, एशोसियट कम्पनीका अध्यक्ष प्रमेश भण्डारी,चितवन उद्योग संघका अध्यक्ष त्रिलोचन कंडेल, रोयल पेन्ट्सका ब्राण्ड एम्बेस्डर  तथा चर्चित एवम् लोकप्रिय गायक प्रकाश सपूत, निर्देशकहरु कृष्ण भण्डारी, पवन राज पौडेल , प्रकाश केसी, वरिष्ठ वित्तीय प्रमुख चिरञ्जीवी पाण्डे लगायतको उपस्थिति रहेको थियो।

उपहार सार्वजनिक कार्यक्रममा १० जना ग्राहकहरुलाई MI स्मार्ट मोबाइल, ५ जनालाई ४३ इन्चको भिडियोकोन टेलिभिजन र बम्पर उपहार अन्तर्गत एक जनालाई बजाज कम्पनीको Palsar150 बिजेता घोषणा गरिएको थियो। पल्सर बाइक भने कर्णाली ट्रेड्रस, कोहलपुर, बाकेबाट रोयल पेन्ट्स खरिद गर्ने छविलाल ओलीले जित्न सफल भएका हुन् ।कार्यक्रममा गायकद्वय प्रकाश सपूत र महेन्द्रराज बरालले गायन प्रस्तुति समेत प्रस्तुत गरेका थिए।

चलचित्र कलाकार संघका महासचिव चेतबहादुर सिंह “राजा” सांस्कृतिक संघको केन्द्रीय सदस्य मनोनीत

नेपाल चलचित्र कलाकार संघका महासचिव, चर्चित कलाकार तथा निर्माता चेतबहादुर सिंह “राजा” नेपाल सांस्कृतिक संघको केन्द्रीय सदस्यमा मनोनीत भएका छन् ।

नेपाली कांग्रेसको शुभेच्छुक संस्था सांस्कृतिक संघको २०७८ मंसिर १५ गतेको पदाधिकारी बैठकले अधिकारीलाई केन्द्रीय सदस्यमा मनोनीत गरेको हो ।

नेपाली कांग्रेसको शुभेच्छुक संस्था नेपाल सांस्कृतिक संघको विधानको परिच्छेद– ७ दफा २० (च) बमोजिम अधिकारीलाई केन्द्रीय सदस्यमा मनोनीत गरेको सांस्कृतिक संघका सभापति तीर्थबहादुर थापाले हस्ताक्षर गरेको पत्रमा उल्लेख गरिएको छ ।

महासचिव सिंह विगत लामो समयदेखि नेपाली कलाकारिता क्षेत्र र कलाकारहरुको हकहितको पक्षमा सक्रिय रुपमा निरन्तर लाग्दै आउनु भएको छ । उहाँले चलचित्र निर्माण संँगै २ दर्जनभन्दा बढी नेपाली चलचित्र अभिनय गर्नुभएको छ । उहाँले विभिन्न सामाजिक संघ/संस्था मार्फत विभिन्न बृद्धाश्रम , अनाथलय, अस्पताल र विद्यालहरुमा सेवा र सहयोग गर्दै आउनुभएको छ । उहाँ चलचित्र सीपमुलक तथा व्यतित्वका विकासका लागि राष्ट्रिय तथा अन्तराष्ट्रिय स्तरका सम्मेलनमा समेत सहभागिता जनाईसक्नु भएको छ ।

राष्ट्रिय योजना आयोग उपाध्यक्ष द्वारा बिधालय भवन उद्घाटन, ३२ लाखमा २ कोठे सुबिधा सम्पन्न भवन

 

राष्ट्रीय योजना आयोगका उपाध्यक्ष डा.विश्व पौडेलले कालिका ११ सिद्दी स्थित श्री राष्ट्रीय आधारभुत बिधालय कल्यानचौर रन्तेसको नबनिर्मित २ कोठे भवनको उद्घाटन गर्नु भएको छ । सामुदायिक श्रोत केन्द्र रत्ननगरले रु ३२ लाख रुपियाँको लागतमा सुबिधा सप्पन्न २ कोठे भवन निर्माण गरिदिएको हो । 

 बिधालय ब्यबस्थापन समितिका अध्यक्ष मान बहादुर चेपाङ्को अध्यक्षतामा भएको कार्यक्रममा वडा नं ११ का वडा अध्यक्ष कृष्ण बहादुर प्रजा , सामाजिक ब्याक्तित्व देबेन्द्र श्रेष्ठ , नेपाल मौरिपालक महासंघका अध्यक्ष शिव पौडेल लगाएतले मन्तब्य राखेका थिए । 

 

कार्यक्रमका प्रमुख अतिथी डा विश्व पौडेलले भण्डाराबाट मलेखु जोड्ने सडक वास्तविक चेपाङ मार्ग नभएको ए एक सय प्रतिसत चेपाङ्हरु मात्र बसोबास रहेको शक्तिखोरदेखि सिद्दी तीनदोभान दौतेस खिर्की ठकुरी भञ्ज्याङ् हुँदै हात्तिढाप जोडिने सडकलाई स्तर उन्नती गरि कालोपत्रे गरेर बस्तबिक चेपाङ मार्गको रुपमा बिकास गरि पर्यटन प्रबर्दन गर्ने र त्यसका लागि आफुले प्रत्याप्त बजेट बिनियोजन गर्ने बताउनु भयो । 

 चेपाङ केन्द्रका अध्यक्ष सम्मानित 

 सोही बिधालय भवन उद्घाटनको अबसर पारी समग्र चेपाङ जातिको उत्थान र उन्नतीका निम्ति उल्लेखनीय योगदान पुर्याएको भन्दै गामबेशिको चेपाङ संरक्षण केन्द्रका अध्यक्ष केपि किरण शर्मालाई रास्ट्रीय योजना आयोगका उपाध्यक्ष आदरणीय विश्व पौडेलको हातबाट , बिधालयका प्रधानाध्यापक दिनेश चेपाङ्ले सम्मान गर्नु भएको छ । सम्मानित भइ सकेपछी अध्यक्ष शर्माले आफुलाई अझै जिम्मेवारी थपिएको बताउनु भयो ।

खैरहनी नगरपालिका नगर सभा, वडागत ७४ वटा योजना संशोधन

पुष २९ गते । 

चितवनको खैरहनी नगरपालिकाको दसौं नगर सभा विहीवार सम्पन्न भएको छ । 

 नगर सभाले नगरपालिकामा कार्यरत कर्मचारीहरुको व्यवस्थापन गर्न बनेको ऐन २०७८ सहित वडागत योजना संशोधन गरेको छ । नगर सभामा नगर प्रमुख लालमणी चौधरीले प्रस्तुत गरेको नगरपालिकामा कार्यरत कर्मचारीहरुको व्यवस्थापन गर्न बनेको ऐन २०७८ सहित विभिन्न प्रस्ताव पारित गरेको प्रमुख प्रशासकीय अधिकृत चन्द्रकान्त न्यौपानेले बताए । 

 नगर उपप्रमुख सुनिता थपलियाले योजना संसोधनको प्रस्ताव गरेकी थिइन् । वडागत ७४ वटा योजना संशोधन गरि १०७ वटा पुर्याइएको छ । नगर सभामा विषयत समितिबाट हाल सम्मको प्रगति विवरण प्रस्तुत गरिएको थियो । 

आर्थिक विकास समिति संयोजक कारीराम चौधरी,सामाजिक विकास समिति संयोजक मनेजर महतो,पूर्वाधार विकास समिति संयोजक होमकुमार पुन,सार्वजनिक खरिद तथा क्षमता,सुसासन विकास समिति संयोजक टिकादत्त इटनी,वातावतरण तथा विपद व्यवस्थापन समिति सदस्य रामशरण पाण्डे,विधायन समिति संयोजक देववहादुर वस्नेत, लेखा समिति संयोजक टिकाराम तिमल्सीना,न्यायिक समिति सदस्य गोमादेवी भुजेलले आआफ्नो समितिको प्रतिवेदन नगर सभामा पेश गरेका थिए ।

चेपाङ विद्यार्थीको शिक्षाका लागि सपना भिलेजको सहयोग

चितवन । इच्छाकामना गाउँपालिका २ तोवाङ स्थित भुलभुले आधारभूत विद्यालयमा अध्यायन गर्ने चेपाङ विद्यार्थीहरुका लागि विभिन्न सहयोग गरिएको छ । सौराहामा रहेको सपना भिलेज सोसियल इम्प्याक्ट र रेस्टुरेन्ट एण्ड बार एसोसियशन सौराहाले सो विद्यालयलाई खानापकाउने चुल्हो,खाद्यान्न,भाडाकुँडा,फर्निचर र विद्यार्थीलाई स्टेशनरी तथा न्यानो कपडा सहयोग गरेको हो ।

  धादिङको हुग्दीबाट करिव डेढ घण्टा गाडी चढेर पुगिने सो विद्यालय संकटको अवस्थाबाट गुज्रिएको जानकारी पाएपछि गाउँपालिकासंगको समन्वयमा सहयोग गरिएको सपना भिलेज सोसियल इम्प्याक्टका अध्यक्ष धु्रव गिरीले जानकारी दिए । इम्प्याक्टका अध्यक्ष धु्रव गिरी र रेवानका महासचिव सुर्य रिमालले विद्यालयका प्रधानाध्यापक विष्णु अधिकारीलाई ति सामाग्रीहरु हस्तान्तरण गरे । सोसियल इम्प्याक्टले इच्छाकामना १ मा सवै यात्राको सुरुवात एक सपनाबाट हुन्छ नामक परियोजना संचालन गरिरहेको छ ।

  इम्प्याक्टका कार्यक्रम निर्देशक सुजन वस्नेतका अनुसार ३८ थान डेस्कवेन्च,दिवा खाजाका लागि खाद्यान्न सामान, खाना वनाउने चुल्हो २ थान तथा विद्यार्थीलाई स्टेशनरी र न्यानो कपडा प्रदान गरिएको हो । भुलभुल विद्यालयमा ६१ जना विद्यार्थी अध्ययनरत छन् । त्यहाँ सवै चेपाङ समुदायका विद्यार्थी छन् । आर्थिक अवस्थाका कारण विहान वेलुका खानेकुरा र न्यानो कपडाको अभावबाट गुज्रिरहेकाको अवस्थामा विद्यालय नियमित गराउन सहयोग गरिएको इम्प्याक्टका अध्यक्ष धु्रव गिरीले बताए । इम्प्याक्टले विगत एक वर्षदेखी सरकारले प्रदान गर्ने वाहेक पेटभरी खाना पुग्ने गरि दिवा खाजाको व्यवस्था गर्दै आएको छ ।