लक्की मिडिया हाउसले चलचित्रको विशेष शो संगै सम्मान कार्यक्रम गर्ने

चितवन । मोफसलकै चर्चित लक्की मिडिया हाउस चितवनको सोमबार बसेको बिशेष बैठकले चलचित्रको विशेष शो सँगै विभिन्न क्षेत्रका व्यक्तित्वहरुलाई सम्मान गर्ने भएको छ । मिडिया हाउसले विभिन्न विधा तथा क्षेत्रमा समाज रुपान्तरण र विकासमा भूमिका खेल्ने व्यक्तित्वहरुलाई सम्मान गर्न लागेको हो । 

 

कोभिड १९ बाट सबैभन्दा बढी प्रभावित भएको चलचित्र क्षेत्रलाई चलायमान बनाउन र आम दर्शकहरुलाई फिल्म हलमा चलचित्र हेर्नका लागि आह्वान गर्दै विशेष शो संगै सम्मान कार्यक्रम गर्न लागिएको हो । यस्ता कार्यक्रमको आयोजनाले कलाकारिता क्षेत्र तथा सामाजिक क्षेत्रमा थप प्रोत्साहन मिल्ने विश्वास लिएको मिडिया हाउसका महाप्रबन्धक हरि कार्की ‘लक्की’ले बताउनुभयो । 

मोफसलमा रहेर लक्की मिडिया हाउसले चितवनमा बिभिन्न कार्यक्रमहरुको आयोजना समेत गर्दै आएको छ । नेपाली सिनेमा बजारको प्रचार र सिनेमा क्षेत्रको प्रवद्धनको लागि निरन्तर लागिएको लक्की मिडिया हाउस चितवनले विभिन्न नेपाली चलचित्रको रेड कार्पेट प्रिमियर शो, प्रिमियर शो, विशेष शो तथा च्यारीटी शो गर्दै आएको छ । यस अघि पनि विभिन्न कलाकार तथा विभिन्न क्षेत्रका व्यक्तित्वहरुलाई चलचित्रको विशेष शोको आयोजना गर्दै सम्मान गरेको थियो ।