पर्यो है पन्चे बाजामा ठिटा ठिटीको घम्साघम्सी

Mahila Samiti

Manavadhikar Samiti

Teen Dal Meeting

जनवादी गायक जीवन शर्माको जीवन

‘संघर्ष’ युद्धमैदानमा मात्र होइन, जीवनमा पाइलैपिच्छे गाँसिएर आउने काडाँदार खराउ रहेछ । जनवादी गायक जीवन शर्माको जीवन हेर्दा यस्तै लाग्छ । उनको जीवनमा संघर्षका कठिनमय मोड आइलागेका होइनन्, आफैले रोजेका हुन् । सर्वहारा वर्गको गीत गाएर हिँडेका उनी आफै सर्वहारा जीवन बाँचिरहेका छन् । लाखौ मान्छेको सपनाको शहर काठमाडौमा उनी भने आम मान्छेका साझा सपनाको धुन सोच्दै सडक र फुटपाथमा फित्ते चप्पल पड्काउँदै हिडिरहेका भेटिन्छन् । जीन्दगी अभावमा चले पनि ओठमा हाँसो छुटेको छैन ।
धन कमाउन चाहेको भए उनले धेरै कमाउने सम्भावना पनि थियो । छँदा खाँदाको स्कूले हेडमास्टरको जागिर छाडेर गायनतिर लाग्दा उनी समाजका नजरमा मति बिग्रेको मान्छे बने । थप धन कमाए पनि बाबुकै सम्पत्ति सम्हालेर बस्दा पनि काइदाको जीन्दगी चल्थ्यो । बाबु उतिबेला पंचायती व्यवस्थामा बाग्लुङमा प्रधानपञ्च र जिम्मावाल थिए । छोराको आँखामा आफ्नै बाबुजस्ता मान्छेहरुबाट हेपिएका, दविएका र ठगिएका समाजका निमुखा मान्छेका आँशुले पोलिरहेको थियो । आज रक्तिम परिवारको टोली सहित जोशिएर गाउँदा ती आँशुको भार केही हदसम्म कम हुँदै गएको आत्मसन्तोष संगालेका छन् जीवनले ।

२०३२ सालदेखि गीत गाउन शुरु गरेका जीवनले २०४१ सालदेखि भूमिगत भएर गाउन थाले । पिंढी, मझेरी, आँगनी र वस्तीहरुमा गाउँदै हिडेका गीतहरु प्रजातन्त्र पुनवर्हाली पछि २०४७ सालमा रेकर्ड गरेर ल्याउँदा देशव्यापी रुपमा लोकप्रिय भए । साढे तीन दशक लामो गायन यात्रा पार गरेर आएपछि आफ्नो उपलब्धिको खाता केलाउँदा के खेल्दो हो, एउटा कलाकारको मनमा? यो कुरामा उनले कहिल्यै हेक्का राखेनन् । त्यही भएर परिवारबाट गुनासो र दुःखेसो धेरै सुनेका छन् र त्यो रोकिने छाँट पनि छैन आजीवन । आर्थिक अभावले गरिव–दुःखीका गीत सिर्जना गर्न झन् उर्जा दिने गरेको छ, उनलाई ।

सिमली छायाँमा बसी भरीया लामो सास फेरेको
उमेर भइसक्यो असी झन् ठूला दुःखले घेरेको

अहिलेसम्म ४४ वटा गीति एल्बम निकालिसकेका छन् । चार सय भन्दा बढि गति रेकर्ड भइसके । तीमध्ये एक सय भन्दा बढी गीतमा लेखन र संगीत उनकै छ । पछिल्लो समयमा नयाँ  सिर्जना आउन सकेको छैन । कारण आर्थिक अभाव । हितैषी र शुभेच्छुकहरुले सहयोग गर्ने गरे पनि अहिले त जनता आफै अप्ठेरो स्थितिमा रहेका बेला कति मागिरहुन भनेर मर्मबोध गर्छन । अहिलेसम्म जिविकाको मेलो देश विदेशमा विभिन्न महोत्सवमा गर्ने सांगीतिक प्रस्तुतिनै हो । त्यस्ता सांगीतिक प्रस्तुतिमा सहभागी हुन जाँदा उनी विक्रीका लागि झोलाभरि गीतका सिडी बोक्छन् । जनताको लागि चेतनामूलक गीत गाउँदै हिड्ने कलाकारले कलाक्षेत्रमा लागेबापत अहिलेसम्म शर्माले केही पाएका छैनन् दर्शक श्रोताको माया बाहेक ।

 तीन छोरा र एक छोरीका पिता, पति र पुत्रको परिचय गायक जीवनको सानो संसार हो । आमा र पत्नीको नारी संवेदनाले उनलाई भिजाइरहेको हुन्छ । तर गायक शर्माको लागि शहरको दुई कोठा र परिवार पर्तिर पो छ गुजुल्टो परेको विश्व । उनी डेराको बासबाट निस्किएर त्यही गुजुल्टो फुकाउन वर्षौदेखि लागिपरेका छन्, संगीतलाई माध्यम बनाएर ।
Source : http://ramaailo.com/artists/jivan-sharma